Ministri i Mbrojtjes, Pirro Vengu ishte sot në Bazën Ajrore në Farkë, ku inspektoi punimet për ndërtimin e hangarit të ri për helikopterët Black Hawk.
Vengu u shpreh se “hangari i ri i skuadronit të helikopterëve Black Hawk që po ndërtohet në Bazën Ajrore Farkë është një investim domethënës për nevojat e mjeteve të reja dhe ekuipazheve të tyre për realizimin e detyrave dhe misionit”.
Ai theksoi se, “me përfundimin e ndërtimit të këtij hangari, synohet kryerja e punimeve të mirëmbajtjes së helikopterëve Black Hawk në këto mjedise nga vetë teknikët tanë, çka ul ndjeshëm kostot e mirëmbajtjes dhe rrit po ashtu ndjeshëm nivelin e gatishmërisë dhe operacionalitetit”.
Nga ana tjetër, shtoi Vengu, “ekuipazhet e helikopterëve të rinj po trajnohen nga aleati ynë strategjik që të kryejnë jo vetëm transport trupash apo evakuime mjekësore, por të angazhohen edhe në emergjencat civile dhe operacionet e kërkim–shpëtimit”.
Gjithashtu, nënvizoi Vengu, “trajnimi synon që nga gatishmëria “nga lindja e diellit deri në perëndim të tij”, të kalojë në gatishmëri 24 orë, për të realizuar operacione edhe natën”.
