Kroatët rikonfirmuan kursin properëndimor të vendit duke refuzuar me votë në zgjedhjet parlamentare një ofertë populiste nga presidenti i vendit.
Partia konservatore në pushtet e udhëhequr nga kryeministri Andrej Plenkoviç fitoi bindshëm, por jo mjaftueshme për të formuar qeverinë e vetme.
Bashkimi Demokratik Kroat fitoi 60 vende në asamblenë prej 151 anëtarësh, sipas të dhënave ende jo zyrtare, duke e detyruar të kërkojë koalicion për të ruajtur pushtetin
Partia Social Demokratike, ose SDP e presidentit Milanoviç siguroi 42 vende.
Partia e së djathtës ekstreme, Lëvizja për Shtetësinë u radhit e treta, me 14 vende, gjë që i jep asaj një rol vendimtar në negociatat për qeverinë e ardhshme.
“Ne do të fillojmë të formojmë një shumicë të re parlamentare për të krijuar qeverinë tonë të tretë,” tha Plenkoviç në fjalimin e tij të fitores.
Kryetari i SDP-së tha se ndërsa rezultatet treguan se njerëzit duan një ndryshim edhe pse nuk ishin ato që prisnin.
Zgjedhjet pasuan një fushatë të ashpër mes presidentit dhe kryeministrit, e cila krijoi një krizë politike në vendin ballkanik prej 3.9 milionë banorësh, anëtar i Bashkimit Evropian dhe NATO-s.
Partia në pushtet bëri fushatë duke iu kujtuar votuesve rritjen ekonomike të kohëve të fundit, të nxitur nga anëtarësimi i vendit në zonën ‘Schengen’ dhe në eurozonë.
Social Demokratët në anën tjetër theksuan luftën ndaj korrupsionit, pasi partia e kryeministrit është prekur nga mori skandalesh korrupsioni dhe hetimesh kundër zyrtarëve vitet e fundit.
Presidenti ka një rol kryesisht ceremonial në Kroaci, ndërsa kryeministri ushtron pjesën më të madhe të pushtetit politik. Milanoviç, si president cakton datën e zgjedhjeve, dhe me një lëvizje të pazakontë lajmëroi muajin e kaluar se do të kandidonte në zgjedhje duke qenë ende në detyrë.
Gjykata e lartë e vendit vendosi se kjo ishte jokushtetuese dhe e ndaloi atë të bënte fushatë.
Atij gjithashtu iu ndalua të paraqitej zyrtarisht në listat e kandidatëve dhe SDP-së iu ndalua që të bënte fushatë për të si kandidat për kryeministër.
Kryeministri Andrej Plenkoviç ndërkohë ka lajmëruar nisjen e menjëhershme të negociatave që priten të jenë të vështira për ti dhënë Kroacisë qeverinë e re.
