Sipas Times of Israel, mbledhja zgjati gati gjashtë orë dhe u zhvillua me dyer të mbyllura, ndërsa tensionet mes ministrave arritën kulmin.
Shefi i Shtabit kërkoi marrëveshjen, Netanyahu e refuzoi
Gjeneral-Major Eyal Zamir, kreu i ushtrisë izraelite (IDF), këmbënguli që kabineti të merrte në shqyrtim një marrëveshje të re për armëpushim, për të siguruar lirimin e 10 pengjeve të gjalla dhe kthimin e mbetjeve të 18 pengjeve të vrarë, në këmbim të lirimit të qindra të burgosurve palestinezë dhe një armëpushimi 60-ditor.
Por Netanyahu refuzoi kategorikisht, duke deklaruar se “një marrëveshje e pjesshme nuk ka kuptim” dhe se Presidenti amerikan Donald Trump i kishte kërkuar të mos pranonte një propozim të tillë.
“Nuk ka asnjë arsye për votim. Nuk është në tryezë”, tha Netanyahu, duke refuzuar presionin e disa ministrave për të mbajtur një votim zyrtar.
Ushtria: Marrëveshja e Hamasit është thuajse identike me atë që kishim pranuar
Hamasi njoftoi më 18 gusht se ra dakord me një marrëveshje të re, e cila – sipas IDF – është “thuajse identike me atë që Izraeli e kishte pranuar më parë”. Megjithatë, qeveria izraelite tani kërkon një marrëveshje gjithëpërfshirëse që përfshin dorëzimin e Hamasit dhe kthimin e të gjithë pengjeve menjëherë.
Zamir tha para kabinetit se marrja e 75% të territorit të Gazës nga ushtria ka krijuar kushtet për një marrëveshje të mundshme dhe se, në rast të dështimit të negociatave pas 60 ditëve të armëpushimit, IDF është gati të rifillojë ofensivën.
Në mbështetje të marrëveshjes dolën edhe Ministri i Jashtëm Gideon Sa’ar dhe Ministrja e Informacionit Gila Gamliel, të cilët theksuan se njohja e shtetit palestinez nga vendet perëndimore po i krijon vështirësi diplomatike Izraelit dhe se një marrëveshje do të ishte një lëvizje strategjike.
Por ministrat e krahut të djathtë, si Itamar Ben-Gvir dhe Bezalel Smotrich, kundërshtuan fuqishëm çdo lloj armëpushimi, siç kanë bërë edhe në të kaluarën.
Ben-Gvir kërkoi mbajtjen e një votimi zyrtar për refuzimin e marrëveshjes, por Netanyahu e hodhi poshtë kërkesën, duke theksuar se nuk ka marrëveshje për të votuar.
