Shkup, 15 korrik – Kryetari i Komunës së Çairit, Visar Ganiu, ka njoftuar sot vazhdimin e punimeve për asfaltimin e një segmenti të ri të rrugës “Ismail Kadare” në lagjen Seravë, si pjesë e angazhimit të palëkundur për përmirësimin e infrastrukturës rrugore dhe urbane në komunë.
“Ky është një investim që jo vetëm lehtëson qarkullimin, por përmirëson ndjeshëm edhe cilësinë e jetës për banorët e kësaj zone,” deklaroi Ganiu.
Ai shtoi se ndërhyrja në këtë rrugë reflekton qasjen strategjike të Komunës për zhvillim të barabartë në të gjitha lagjet e Çairit, përmes projekteve që adresojnë konkretisht nevojat e qytetarëve.
Komuna e Çairit paralajmëron se projekte të ngjashme do të realizohen së shpejti edhe në pjesë të tjera të territorit, në përputhje me prioritetet infrastrukturore të identifikuara në terren.
“Ne nuk ndalemi – Çairi po ndërtohet çdo ditë,” përfundoi Ganiu.
