Presidenti i Kazakistanit, Kassym-Jomart Tokayev tha sot se ai e sheh Rusinë si të pathyeshme dhe kërkoi negociata të shpejta paqeje për t’i dhënë fund luftës në Ukrainë.
Deklarata e tij erdhi gjatë një takimi me kancelarin gjerman Olaf Scholz në Astana – i cili po zhvillon një vizitë tre-ditore në Azinë Qendrore.
“Një përshkallëzim i mëtejshëm i luftës do të çojë në pasoja të pariparueshme për të gjithë njerëzimin dhe para së gjithash për të gjitha vendet e përfshira drejtpërdrejt në konfliktin ruso-ukrainas”, tha Tokayev.
“Është fakt se Rusia është e pathyeshme në aspektin ushtarak”, shtoi ai.
Sipas Tokajevit, ekziston ende një mundësi për të arritur paqen.
Ai deklaroi se të gjitha planet e paqes duhet të shqyrtohen dhe armiqësitë duhet të ndërpriten. “Çështjet territoriale mund të zgjidheshin më pas”, tha presidenti i Kazakistanit.
Rusia tani ka pushtuar rreth një të pestën e Ukrainës – që kur nisi pushtimin e saj në shkallë të plotë në shkurt 2022. Megjithatë, Moska po pretendon edhe pjesë të tjera.
Në vjeshtën e vitit 2022, Putini aneksoi rajonet e Khersonit, Donetskut, Luhanskut dhe Zaporizhias, megjithëse ushtria ruse i kontrollon vetëm pjesërisht rajonet.
Kievi kërkon tërheqjen e plotë të trupave ruse nga territori i tij. Ukraina po mbështetet në fushatën e saj të mbrojtjes nga vendet perëndimore, përfshirë Gjermaninë.
Gjatë vizitës së Scholz, në krye të axhendës ishin dërgesat e naftës dhe zgjerimi i marrëdhënieve dypalëshe.
Të dy vendet arritën një marrëveshje për të zgjatur dhe rritur dërgesat – që aktualisht arrijnë në 100,000 tonë naftë bruto në muaj – përtej fundit të 2024.
Kazakistani është furnizuesi i tretë më i madh me naftë i Gjermanisë -pas Norvegjisë dhe Shteteve të Bashkuara të Amerikës.
Vendi ka pasur rritje ekonomike mbi mesataren vitet e fundit, pjesërisht për shkak të tregtisë me fqinjët e saj Rusinë dhe Kinën.
Megjithatë, ajo ka tërhequr gjithashtu kritika për shkeljet e të drejtave të njeriut, me lirinë e shtypit dhe lirinë e shprehjes së kufizuar.
