Shkollat 9-vjeçare të Shqipërisë po zhvillojnë fazën gjysmëfinale të Konkursit Kombëtar të Gjuhës Shqipe 2024, i zhvilluar në kuadër të Vitit të Gjuhës Shqipe, një nismë e Ministrisë së Arsimit dhe Sportit.
Kryeministri Edi Rama ndau sot në rrjetet sociale momente nga zhvillimi i këtij konkursi, ku marin pjesë 16 shkolla gjysmëfinaliste.
“Disa nga momentet më emocionuese të fazës gjysmëfinale të Konkursit Kombëtar të Gjuhës Shqipe, një festë e madhe e gjuhës që bashkoi 11,000 nxënës nga 930 shkolla të ndryshme anembanë vendit në Vitin e Gjuhës Shqipe”, shkruan Rama.
16 shkollat gjysmëfinaliste janë: “Jeronim De Rada” – Tiranë, “Kushtrimi i Lirisë” – Durrës, “Rilindja” – Kavajë, Shkolla 9-vjeçare Vorë, “A.Z. Cajupi” – Libohovë, “Ismail Klosi” – Mallakastër, “Naun Doko” – Roskovec, “5 Dëshmorët” – Ksamil, “Muhamer dhe Esat Minarolli” – Pogradec, “28 Nëntori” – Kuçovë, “Adem Bedalli” – Peqin, “Ditëro Agolli” – Devoll, “Edith Durham” – Shkodër, Shkolla 9-vjeçare Letaj, Has, “Migjeni” – Pukë dhe “Gjon Ndoci” – Vau i Dejës.
Ky konkurs synon të inkurajojë nxënësit jo vetëm të konkurrojnë, por edhe të zgjerojnë horizontet e tyre kulturore dhe të mësojnë më shumë për gjuhën dhe trashëgiminë e tyre, duke theksuar rëndësinë e gjuhës shqipe si një pjesë thelbësore e identitetit tonë kombëtar në një epokë të shpejtë të ndryshimeve dhe zhvillimeve teknologjike.
Tema e këtij viti, “Gjuha shqipe si identitet kombëtar, kulturor dhe komunikimi në epokën e teknologjisë,” reflekton rëndësinë e gjuhës sonë si një urë mes traditës dhe modernitetit, duke theksuar nevojën për të ruajtur dhe zhvilluar thesarin tonë gjuhësor në një botë gjithnjë e më të globalizuar.
