Kryeministri Edi Rama e ka sfiduar moderatorin e emisionit ‘Report’ të Rai 3 me gatishmërinë për të marrë pjesë në episodin e radhës me kushtin e vetëm që ndërhyrja e tij të bëhet live dhe thotë se pret telefonatën e gazetarit.
Kryeministri Edi Rama: Duke shpresuar se, kur më thatë se do të donit që në programin e tuaj unë të them fjalën time, kjo nuk ishte një gënjeshtër tjetër, unë deklarohem i gatshëm për të marrë pjesë në episodin e radhës të “Report” me kushtin e vetëm që ndërhyrja ime të bëhet live, pasi nuk e fsheh frikën se pasi ta regjistroj me mirëbesim mund të përfundojë në mullinjtë e censurës tuaj, duke pasur parasysh këto precedentë të rëndësishëm në të cilat ju keni censuruar, më pas ofendoni pa baza dhe në fund akuzoni për riprodhim të modelit të Kremlinit, kur, nëse ka ndonjë gjë, do të kishte arsye për të dyshuar të kundërtën.
Në çdo rast, tani jam unë që pres një telefonatë prej jush, duke ju siguruar se do të më gjeni shumë të disponueshëm për të dakordësuar përballjen tonë publike, drejtpërdrejt dhe pa pengje, gënjeshtër pas gënjeshtre, të vërtetë pas së vërtete, duke shpresuar ta mbyll me një përqafim dashamirës virtual, me një det në mes këndvështrimeve tona për vlerën e lirisë së informacionit, e cila siç e the me të drejtë nuk ka çmim.
Rama është i zhgënjyer që moderatori italian e ka krahasuar telefonatën e tij me drejtorin e Rai-t me ndërhyrjet e Kremlinit.
Kryeministri Edi Rama: Edhe nëse programi juaj ka çdo të drejtë të kritikojë duke bombarduar qeverinë e vendit të tij, ai nuk ka të drejtë ta bëjë këtë duke njollosur vendin tim dhe fjalën “shqiptar” me shpifje.
Është gjithashtu për të ardhur keq që ju e krahasoni telefonatën time, shumë civile, si një “pjesë të dëmtuar” nga veprimet tuaja, me ndërhyrjet e Kremlinit që janë bërë ndaj emisionit tuaj. Të paktën në respekt të viktimave të Kremlinit, nuk do të krahasoja kaq lehtë poloniumin e përdorur për të censuruar me vdekje opozitarët e pakëndshëm me një ndërhyrje telefonike të ardhur pas një censure.
