Sekretarit të përgjithshëm i PD dhe bashkëkryetar i Komisionit të Reformës Zgjedhore, Enkelejd Alibeaj ka akuzuar PS dhe grupin Berisha se po bëjnë pazar për Reformën Zgjedhore përmes negociatave sekrete.
Alibeaj thotë se PS duhet të sqarojë publikun nëse ka një tentativë për një marrëveshje të tillë okulte që përflitet në media.
“PS duhet të sqarojë nëse ka vendosur të bëjë pazar për Reformën Zgjedhore. Në media referuar burimeve nga PS dhe grupi i Sali Berishës, është bërë e ditur se ka një dakordësi për të dështuar Komisionin e Reformës Zgjedhore në mënyrë që çështja të kalojë në Komisionin e Ligjeve ku socialistët kanë vendimarrjen me shumicë votash e sidomos ku opozitës i mohohet e drejta e Vetos, si garanci që PS të mos bëjë ligj zgjedhor të njëanëshëm duke peshkuar vota opozitare. Dihet se ata janë kundër votës së diasporës, votimit elektronik, listave të hapura, një zone elektorale. Nëse kjo është e vërtetë ky është një pazar në kurriz të shqiptarëve dhe për interesa të dy individëve që duan të mbajnë peng Shqipërinë, Rama dhe Berisha”, shkruan Alibeaj.
Gjithashtu Aliebaj sqaron se “në emër të PD nuk mund të flasë asnjë i emëruar apo i dëshiruar i Edi Ramës.”
